2Pe 2 | MEU | STEP | Peroveta taudia koikoidia na taunimanima bogaragidiai e nohova; bona umui bogaragimui ai danu hahediba koikoi taudia do bae gini tore. Idia na hahediba herevadia koikoidia bae hadibalai hehuni, bona Biagudia, e hoidia Tauna, bae ḡorea. Bae mase haraga, sibodia edia hahedika ai.

2 Peter 2

Hahediba koikoi taudia

1 Peroveta taudia koikoidia na taunimanima bogaragidiai e nohova; bona umui bogaragimui ai danu hahediba koikoi taudia do bae gini tore. Idia na hahediba herevadia koikoidia bae hadibalai hehuni, bona Biagudia, e hoidia Tauna, bae ḡorea. Bae mase haraga, sibodia edia hahedika ai. 2 A hutuma ese edia dala dikadia ai bae ḡavadia; idia daidiai hereva momokani dalana na dikana bae gwauraia. 3 Edia mata-ḡaniḡani dainai, koikoi herevadia amo lalomui bae ani, ela bona bae abimui; a ihahemaorohenidia na se halahemu, bona ihamasedia na se mahutamu.

Sisiba herevadia

4 Dirava ese e kara havara anerudia na se bogadia hisi, a dibura masemase gabuna ai e tahodia dobi, unuseni ai e ḡuidia ela bona hahemaoro negana. 5 Bona bese gunana danu se bogaia hisi; Noa mo, kara maoromaoro iharorolaina tauna, mai bamona hahituosi ida, e hamauridia, a ia garina asie gariva taudia be utu-utu ese e habuadia. 6 Sodoma bona Gomora danu e habuadia tari, kahu ai e halaodia, gabeai ia garina basie gari taudia matadia ihakanidia; 7 a Lot mo, kara maoromaoro tauna, e hamauria. Una Lot be lalona e hesiku, kara dika taudia edia lebulebu karadia daidiai; 8 ia na kara maoromaoro tauna, a idia padadiai e nohova dinadia iboudiai edia kara havara e itava e kamonaiva dainai ia lalona e hisihisiva. 9 Benaini, Lohiabada ese ia ibadinana taudia hedibaḡani amo baine hamauridia diba, a kara dika taudia baine ḡuidia diba ela bona hahemaoro dinana. 10 Dika hereadia bini: tauanina ena ura bodagadia e ḡava taudia, bona gwau-maoro taudia e dadaraidia taudia. E hekokorokumu, sibodia edia ura e karamu, atai taudia i'ihiihiraidia asie garimu; 11 a aneru, ena be edia goada bona edia siahu na herea, to unu atai taudia asie habadelaidia Lohiabada vairanai.

12 Ini na boroma na heheto, asi daradia; unu e vara toma, ma unu bae dika toma. Asi dibadia ḡaudia e ḡonaḡonalaimu; edia dika lalonai bae mase vaitani, 13 edia kara dika davadia do bae abi. Lebulebu karadia dina ai e moalelaimu; idia na toutou eiava bero na heto; umui ida o aniani heboumu negadia ai danu e aniani lalo-dikamu. 14 Matadia e bodagamu; kara dika ai asie hesikumu; lalo-manoka taudia e idoadiamu; mata-ḡaniḡani karadia ai vada e manada. Uru dikana!

15 Idia na dala maoromaorona vada e rakatania, vada e raka kerere, Balaam, Beoro natuna, ena dala vada e rakalaia. Ia na kara dika davana iabina urana e urava tauna; 16 a ena kerere dainai e sisiba henia, doniki, hereva asi dibana ḡauna, ese taunimanima gadodia ai una peroveta tauna e hereva henia, ena kara kava e gwaua tubu.

17 Idia na ranu guridia kororodia na heheto, eiava ḡahu lai ese e hodaia isi na heto; dibura masemase gabuna vada e seua, idia edia. 18 E hereva kavamu; e heaḡi kavamu; kara kerere-kerere taudia bogaragidia amo e roho maurimu taudia e idoadiamu tau-anina ena heḡahusi bona ena mata-dika amo. 19 Ura kwalimu bae henidia e tomamu, to idia sibodia na mase ena iḡui taudia; badina be darere tauna na kwalimu tauna ena hesiai ai bainela.

20 Badina be eda Lohiabada bona eda Hahemauri Tauna Iesu Keriso dibadia murinai tanobada ena miro ḡaudia amo vada e roho mauri taudia na unu miro ḡaudia ese ma bae idoadia lou bona bae hadareredia, madi, edia dika gunana na maraḡi, edia dika gabena na baine bada. 21 Idia na dala maoromaorona basiema diba bema namo; a dibadia bena e henidia haheḡanina helaḡana amo e raka oho na dika. 22 Hereva heḡereḡerena na idia ediai vada eme momokani, eto, Sisia be ena mumuta e lou heniamu; bona boroma be bae huria to kopukopu ai baine hekui-hekui lou.